[ ::: ♥Keep_Mailing♥ ::: ]™ હમારે જૈસા ઢૂંઢ રહે હૈ વો (Gujarati)

Please use http://translate.google.com/ to translate this article to Language of your choice. ઉનકી નાદાની કી હદ ના પૂછીએ જનાબ હમેં ખોકર, હમારે જૈસા ઢૂંઢ રહે હૈ વો! ડૉ. શરદ ઠાકર     ડૉ. મણવરે શરૂઆત કરી, 'મિસાલ શાહ! ગુડ નેઇમ! તમારું નામ તમારા જેવું જ સુંદર છે. બોલો, શા માટે આવવું પડ્યું છે?'   મિસાલે એકવાર કપાળ પરનો પરસેવો લૂછ્યો, બે વાર ગળા નીચે થૂંક ઉતાર્યું, પછી ત્રણ કટકે અટકી-અટકીને બોલવાનું શરૂ કર્યું, 'ડૉક્ટર... સર... થેન્ક્સ ફોર ધ એપ્રિસિએશન... બટ... વાત એમ છે કે મને છેલ્લા કેટલાક દિવસોથી અજબ જેવાં સપનાં આવે છે...' 'કેટલાક દિવસોથી એટલે? કેટલા દિવસથી? બી પ્રિસાઇઝ...' ડૉક્ટરને સામે બેઠેલી સ્વપ્નસુંદરીને આવતાં સ્વપ્નોની વાત સાંભળવામાં રસ પડ્યો. 'ત્રણ દિવસથી. નવાઇની વાત એ છે કે એકનું એક સપનું ત્રણ દિવસથી આવ્યા કરે છે. વળી સપનાનું રિઝોલ્યુશન એટલું 'હાઇ' હોય છે કે મને એનાં દૃશ્યોની એક-એક વિગત તદ્દન સ્પષ્ટ રીતે દેખાય છે. હું તો વીંટીની મધ્યમાં જડેલો અંગ્રેજી આલ્ફાબેટ પણ વાંચી શકું છું.' 'વીંટી?! આલ્ફાબેટ?!!' ડૉ. મણવર ચકરાઇ ગયા. 'હું માંડીને વાત કરું, ડૉક્ટર.' મિસાલ હવે સ્વસ્થ થઇ ગઇ હતી; સપનાનું વર્ણન કરવા માટે તો એ અહીં આવી હતી. ત્રણ-ત્રણ દિવસથી એકની એક ફિલ્મ જોઇ હોય તો એનું પ્રત્યેક દૃશ્ય યાદ રહી જાય છે, પછી એનું વર્ણન કરવામાં પણ મજા આવે છે. એવી જ મજા અત્યારે મિસાલને આવતી હતી.   'મને આ સપનામાં કંઈ જ અમંગળ જેવું દેખાતું નથી. તું હળવીફૂલ બની જા અને તારા એન્ગેજમેન્ટની તૈયારીમાં લાગી જા! ઓલ ધી બેસ્ટ!' એણે શરૂ કર્યું, 'વાત એમ છે, સર, કે સપનામાં મારી સગાઇની વિધિ થતી હોય એ દેખાય છે. છોકરો ખૂબ જ હેન્ડસમ અને સ્માર્ટ છે. બંને પક્ષોનાં તમામ સગાંઓ હાજર હોય છે. હોટલના એક ભવ્ય ખંડમાં એ મને ઘૂંટણ પર ઝૂકીને 'પ્રપોઝ' કરે છે, હું શરમાઇને હા પાડું છું, બધાં તાળીઓ પાડીને અમને વધાવે છે આ બધું મને સાવ ચોખ્ખું દેખાય છે.' 'લેટ મી આસ્ક. તમારી સગાઇ થઇ ગઇ છે કે બાકી છે?' 'મારી સગાઇ આવતા મહિને થવાની છે. મને ખબર છે કે તમે હવે એવું કહેશો કે આવનારી ઘટના વિશે મારા મનમાં ચાલતા વિચારોનો પડઘો મારા સપનામાં...' 'ના, હું એવું નહીં કહું. તમે બોલવાનું ચાલુ રાખો.' 'પછી મુરતિયો મારી રિંગ ફિંગરમાં વીંટી પહેરાવે છે. હું પણ એને વીંટી પહેરાવું છું.' 'અહીં સુધી તો બધું બરાબર જણાઇ રહ્યું છે.' 'હા, પણ હવે જ પ્રોબ્લેમ આવી રહ્યો છે. મુરતિયો મને વીંટી પહેરાવે છે તે સોનાની છે અને એમાં વચ્ચેના ભાગમાં હીરો કે બીજુ કોઇ નંગ જડવાને બદલે એના નામનો પ્રથમ અક્ષર અંગ્રેજી મૂળાક્ષરમાં ગોઠવેલો છે. એ અક્ષર પણ હું વાંચી શકું છું. એ હોય છે: એસ.' 'એસ ફોર?' 'હું પણ આ જ સવાલ પૂછું છું. જવાબ મળે છે: એસ ફોર સાવન. હું ચોંકી ઊઠું છું અને પછી તરત જ મારી આંખ ઊઘડી જાય છે. સપનું તૂટી જાય છે.' 'પણ આમાં પ્રોબ્લેમ ક્યાં આવ્યો?' 'પ્રોબ્લેમ છે અને ખૂબ મોટો છે. મારી સગાઇ જેની સાથે થવાની છે તે મારો પ્રેમી છે. અમે ત્રણેક મહિનાથી પરિચયમાં છીએ. એ ખરેખર સારો છોકરો છે. મારા સપનામાં મને એ જ દેખાય છે, પણ પ્રોબ્લેમ એ છે કે એનું નામ સાવન નથી. એનું નામ તો અહેસાસ છે, અહેસાસ મહેતા.' ડૉ. મણવર વિચારમાં પડી ગયા. એમનું તબીબી વિજ્ઞાન સ્વપ્ન વિશે ઘણું બધું કહેતું હતું. માનવી બે અવસ્થામાં સ્વપ્ન જુએ છે: અચેતન નિદ્રાવસ્થામાં આવતાં સપનાં એને યાદ રહેતાં નથી પણ ખરેખર એના પરથી જ એ માણસની અસલિયતની માહિતી મળે છે, પણ જે સપનું માણસને ઊંઘમાં, પરંતુ ચેતનાવસ્થામાં આવે છે તે જ યાદ રહે છે. અને એવા સપનાનું એનેલિસિસ સાવ જુદું જ હોય છે. સામે બેઠેલી લગ્નોત્સુક મુગ્ધાને આ બધું સમજાવવા ક્યાં બેસવું? ડૉ. મણવરે ટૂંકમાં પતાવ્યું, 'તારું સપનું તને યાદ રહ્યું છે માટે એને ગંભીરતાથી લેવાની જરૂર નથી. સાવન નામનો અર્થ સાંકેતિક કાઢવો પડે. જેમ કે તારી સગાઇની વિધિ શ્રાવણ માસમાં થવાની છે એ તું જાણે છે. બીજો સંકેત એવો પણ લઇ શકાય કે તમારા ભાવિ લગ્નજીવનમાં સુખનો શ્રાવણી વરસાદ જોવા મળશે. તમારા દામ્પત્યમાં પ્રેમની ભીનાશ માણવા મળશે. આવા તો ઘણા સંકેતો કાઢી શકાય. પણ મને આ સપનામાં કંઇ જ અમંગળ જેવું દેખાતું નથી. તું હળવીફૂલ બની જા અને તારા એન્ગેજમેન્ટની તૈયારીમાં લાગી જા! ઓલ ધી બેસ્ટ!' મિસાલ ગઇ તો ખરી પણ સાવ હળવીફૂલ જેવી થઇને નહીં, સપનામાં એક-બે વાત હજી એવી હતી જે ડૉક્ટરની સમજાવટ પછી પણ એના દિમાગમાં ઊતરી ન હતી. એમાં એક તો દીવાલ પર લટકતું કેલેન્ડર હતું. અર્ધનગ્ન સેક્સી મોડલ ગર્લના ઇરોટિક પોઝવાળું એ કેલેન્ડર...! સગાઇની તારીખ જુલાઇ મહિનાની સત્તરમી તારીખ નક્કી થઇ હતી. બધી તૈયારીઓ પુરજોશમાં થઇ રહી હતી. હજુ પંદર દિવસ બાકી રહ્યા હતા, અચાનક એવી ઘટના બની ગઇ કે જેના કારણે બંને પક્ષો ઉપર આકાશ તૂટી પડ્યું. અહેસાસ બાઇક પર બેસીને ખરીદી કરવા માટે નીકળ્યો હતો. ઝવેરીની દુકાને જઇ રહ્યો હતો. પંદર દિવસ પહેલાં ઓર્ડર આપ્યો હતો. રિંગ સેરેમની માટેની ખાસ પ્રકારની વીંટી બનાવડાવી હતી. એ દિવસે લેવા જવાનું હતું. ભીના રસ્તા પર બાઇકનું વ્હીલ લપસ્યું, બાઇક એક દિશામાં, અહેસાસ બીજી તરફ. રોડ ડિવાઇડરના પથ્થર સાથે એનું માથું અફળાયું. ત્યાં જ રામ રમી ગયા. અહેસાસનાં મમ્મી-પપ્પાનાં દુ:ખ અને આઘાત વિશેની તો કલ્પના કરી જ શકાય, પરંતુ કન્યાપક્ષનો આઘાત પણ અસહ્ય હતો. મિસાલ તો દિવસ-રાત રડતી રહેતી હતી. એની આંખો સૂઝી ગઇ. ચહેરો મૂરઝાઇ ગયો. ખાવાનું સાવ ઓછું થઇ ગયું. ગાલમાં ખાડા પડી ગયા. એ અર્ધપાગલ જેવી થઇ ગઇ. એનાં મમ્મી-પપ્પાએ પંદરેક દિવસ પછી વાત કરવાનો પ્રયાસ કર્યો, 'બેટા, જે થયું તે થયું! હવે બીજા મુરતિયા જોવાનું...?' જવાબમાં મિસાલ કંઇ બોલી તો નહીં, પણ એવી ધારદાર નજરથી એણે જોયું કે મમ્મી-પપ્પા ચૂપ થઇ ગયાં. એ પછી બીજી વાત એ વાત કાઢવાની એમણે હિંમત જ કરી નહીં. છેક ડિસેમ્બરમાં આ ઉદાસીની અમાસી રાતે આશાના કિરણ જેવી ઘટના બની ગઇ. અહેસાસનાં મમ્મી-પપ્પા મળવા આવ્યાં. અહેસાસના પપ્પાએ પ્રસ્તાવ રજૂ કર્યો, 'અમારા ભાગ્યમાં મિસાલ જેવી વહુનું સુખ લખાયું અને પછી ભૂંસાઇ ગયું. પણ અમારે મિસાલને અમારા પરિઘની બહાર નથી જવા દેવી. અમે બે ભાઇઓ છીએ અને અમારી બંનેની પત્નીઓ સગી બહેનો છે. અમારું સંયુક્ત કુટુંબ છે. તમારી મિસાલ અમારા જ ઘરમાં વહુ બનીને આવશે.' 'એ કેવી રીતે? અહેસાસનું તો મૃત્યુ...!' 'હા, પણ મારો ભત્રીજો અહેસાસની જ ઉંમરનો છે. એ દોઢ વર્ષથી અમેરિકામાં છે. અહેસાસનાં લગ્નમાં એ આવવાનો હતો, પણ હવે અમે નક્કી કર્યું છે કે એ પોતાની સગાઇ વખતે જ આવશે. જો તમને વાંધો ન હોય તો મારા ભત્રીજા માટે તમારી દીકરીનો હાથ...' પપ્પા-મમ્મી કંઇ 'હા-ના' કરે તે પહેલાં મિસાલે જ કહી દીધું. 'અહેસાસના પપ્પા જે કહે તે મને મંજૂર છે. મારે એમના ભત્રીજાને જોવો પણ નથી. તમે શુભ દિવસ નક્કી કરી દો.' જાન્યુઆરી મહિનાની અઢારમી તારીખ નક્કી કરવામાં આવી. એક ફાઇવ સ્ટાર હોટલમાં અવસર આયોજિત કરવામાં આવ્યો. બ્યુટીપાર્લરમાં તૈયાર થઇને આવેલી મિસાલે જેવો સુશોભિત હોલમાં પ્રવેશ કર્યો એવી જ એ ચમકી ગઇ. મહિનાઓ પહેલાં સપનામાં જેવો હોલ જોયો હતો એવો જ, ના, એ જ હોલ એ અત્યારે જોઇ રહી હતી. ફૂલોનું ડેકોરેશન, સ્ટેજ, લાઇટિંગ, ખુરસીઓ, બધું જ સપનામાં જોયું હતું એવું જ! અને પછી ઉપસ્થિત થયો મુરતિયો! મિસાલના હોઠો પરથી એક હળવી ચીસ નીકળી ગઇ: 'અહેસાસ?! તું??' યુવાન હસ્યો, 'ના, મિસાલ! હું અને અહેસાસ આઇડેન્ટિકલ ટ્વિન્સ જેવા હતા. હું એનો કઝીન છું. સાવન નામ છે મારું. લાવ, તારો જમણો હાથ!' અને સાવને વીંટી કાઢીને મિસાલની રિંગ ફિંગરમાં પહેરાવી દીધી. મિસાલ એ વીંટીમાં જડાયેલા 'એસ'ને ટીકી-ટીકીને જોઇ રહી. પછી એની નજર દીવાલ પરના કેલેન્ડર પર પડી. કેલેન્ડરનું પૃષ્ઠ જાન્યુઆરી મહિનો બતાવતું હતું. એને યાદ આવી ગયું કે અહેસાસ સાથેની સગાઇ તો શ્રાવણમાં હતી, તો પછી સપનામાં દેખાતું કેલેન્ડર જાન્યુઆરી મહિનો કેમ બતાવતું હતું?! વિજ્ઞાન પાસે આ પ્રશ્નનો કોઇ જવાબ ન હતો.

--
You received this message because you are subscribed to the Google Groups "Keep_Mailing" group.
To unsubscribe from this group and stop receiving emails from it, send an email to keep_mailing+unsubscribe@googlegroups.com.
To post to this group, send email to keep_mailing@googlegroups.com.
Visit this group at https://groups.google.com/group/keep_mailing.
To view this discussion on the web visit https://groups.google.com/d/msgid/keep_mailing/CAH3M5OsxVQk8ztC1XeTY-FEuaXAzFhG52abZ9s2s8DDZpZN4cQ%40mail.gmail.com.
For more options, visit https://groups.google.com/d/optout.