[ ::: ♥Keep_Mailing♥ ::: ]™ એક વરસાદી સાંજે (Gujarati)

Please use http://translate.google.com/ to translate this article to Language of your choice. એક વરસાદી સાંજે મસ્તરામની મસ્તી-મિલન ત્રિવેદી ને યાદ છે કે અમારી યુવાનીના સમયે ઝી ટીવી પર વરસાદનાં ગીતો બતાવવામાં આવતાં અને એ પણ રાત્રે ૧૧.૩૦થી ૧૨.૦૦. મને બરાબર યાદ છે કે ગમે તેવી નિંદર આવતી હોય પણ ખાસ જાગીને આ ગીતો જોવાના જ. એક રાત્રે હું ગીતો જોતો હતો અને એક ગીત આવતું હતું 'બદન જલ રહા હૈ, શમા જલ રહા હૈ' અને બરાબર મારા માથા પાછળથી પપ્પાની ટાપલી પડી અને મને કહે 'સુઇ જા નહિતર હવે આ ઘર પણ સળગાવશે.' પપ્પા જે સમજ્યા હોય એ પણ હું કોઈ પણ પ્રકારના ખરાબ ઇરાદા વગર મને વરસાદનાં ગીતો ગમે એટલે સાંભળતો! મને સૌથી વધુ દુ:ખ તો ત્યારે થતું કે સાચું ચોમાસું હોય ત્યારે બરાબર ગીતો શરૂ થાય અને એ સમયે જ લાઇટ જતી રહે. સાવ મૂડની પથારી ફરી જાય. મારો આ વરસાદી પ્રેમ મારા મિત્રો પણ નહોતા સમજી શકતા. એ લોકો પણ મને એમ જ સમજાવતા કે જો ગીતો ગમતાં હોય તો સાંભળી પણ શકાય પણ એ તુચ્છ લોકોને શું ખબર પડે કે હીરો હીરોઇન પલળતાં પલળતાં હોય અને પછી જ્યારે ટીવીમાં ગીત દેખાતું હોય ત્યારે એ કેટલું સુંદર દ્રશ્ય સર્જાય! એ સમયમાં મેં જો પ્રેમનો અદ્ભુત અનુભવ કર્યો હોય તો આ વરસાદી ગીતોમાં. કેવા એકબીજામાં નાયક નાયિકા મશગૂલ હોય કે આપણે પણ એ જ માહોલમાં જતા રહીએ.   આખી ફિલ્મમાં ક્યારેય સાળીનો પાલવ નીચે પડવા ન દીધો હોય પણ આ ગીતમાં ક્યાં ઉડતો હોય એની ભાન પણ ન રહે માત્ર વરસાદ જ કરી શકે!   અત્યારના સંજોગોમાં ફેસબૂકનો અને વોટ્સએપનો એક આભાર છે કે શેરીએ શેરીએ કવિઓ પેદા કરી દીધા છે. જેટલા છાંટા ન પડ્યા હોય એટલી તો કવિતાઓ માર્કેટમાં ફરવા લાગે. મને તો એમ થાય કે ચોમાસું બેઠું એ ખબર જો આ કવિઓ ન આપતા હોત તો બચારો વરસાદ શું કરત? વરસાદ અને પ્રેમને આમ કોઈ સ્નાનસૂતકનો સંબંધ ભલે ન હોય પણ આ કવિઓએ સાબિત કરી દીધું કે વરસાદ આવે તો જ પ્રેમ થાય. આ વર્ષો જૂનો રિવાજ આજની તારીખ સુધી અકબંધ સચવાયેલો છે. 'મને વરસાદમાં નહાવું બહુ ગમે.' કહીને પોતાની પ્રેમિકા સાથે નહાવા નીકળી જાય અને પછી બીજી જ સવારે છીંકો ખાતો ડોક્ટરની ચેમ્બરમાં મળે પણ પોતાના પ્રેમ સાથે નહાવા ન નીકળ્યો હોય તો સમાજ શું વાતો કરે? પહેલા વરસાદમાં નીકળ્યા હોય ત્યારે જે ગારો થયો હોય અને એમાં આવાં કેટલાં પ્રેમીઓએ હાથ પગ ભાંગ્યા હશે એનો હિસાબ ન કરો, બસ તમારે તો વરસાદ, પહેલો પ્રેમ, સાથે ભીંજાવાની મઝા આવું બધુ જ યાદ રાખવું! વોટ્સએપ, ફેસબૂક જેમ વરસાદની ખબર પાડે છે એમ વરસાદની મઝા બગાડી પણ નાખે. અમે બે ચાર મિત્રો હજુ બે-ચાર છાંટાઓ પડ્યા ત્યાં જ ભજિયાં ગોતવા નીકળી પડ્યા.   અમુક ઉંમર થયા પછી પ્રેમિકાને યાદ કરતા પહેલા વરસાદમાં ભજિયાં યાદ આવવા માંડે છે. અમે તો જઈને મોજથી ભજિયાં આરોગ્યા અને એ પણ ભરપેટ. ઘેર પહોંચ્યો ત્યાં મોબાઇલમાં મિત્રોની ફેસબૂક પરથી સેલ્ફી ડાઉનલોડ કરીને મારા પત્નીશ્રી ઊભાં જ હતાં. જો કે વાંક વગર પણ ગુનો સ્વીકારતા હોઇએ તો અહિંયા તો સીધું જ પ્રૂફ હતું. સજાના ભાગરૂપે મારે ચાલીને ઘર માટે ભજિયાં લેવા જવાના હતાં. ઘર પાસેથી ગારો ખૂંદતા અને વરસાદમાં પલળતા હું નીકળ્યો ત્યારે મને ખબર પડી કે આ વરસાદની વાતો ફેસબૂક પર જ સારી લાગે. નવે નવા સ્લીપરની પટ્ટી તૂટી ગઈ પણ હિંમત રાખીને ભજિયાંની દુકાને પહોંચ્યો અને ઓર્ડર કર્યો ત્યાં તો રેઇનકોટમાં સજ્જ એક મહાકાયા બાજુમાં આવીને ઊભી રહી. મને ક્યાંક જોયેલા લાગ્યા એટલે આંખમાંથી છાંટાઓ સાફ કરીને જોયું તો પત્નીશ્રી હાજર હતાં. મારો પ્રશ્ર્ન વાજબી હતો કે જો એમણે જ લેવા આવવાનું હતું તો મને આટલો હેરાન શું કામ કર્યો પણ મને જવાબ આપ્યો ત્યારે વરસાદ પરનો ગુસ્સો ઓર વધી ગયો.   મને કહે 'આ તો તમે ત્યાં પહોંચો ત્યાં સુધીમાં ભજિયાં ઠંડા થઈ જાય તો ન ભાવે એટલે લેવા આવી છું. તમે તમારે શાંતિથી આવો કેમ કે આ સ્કૂટીમાં તો હું એક જ સમાઇ શકું એમ છું.' આ દુ:ખ કુંવારાઓ ક્યાંથી સમજી શકે? એમની તો હજુ પણ એ માન્યતા છે કે સવારના પહોરમાં ભીના વાળથી પાણીના છાંટા ઉડાડીને જાનુ, બકા, બબુ જેવા શબ્દો સાથે જગાડતી હોય છે. પરણેલાને જ ખબર હોય કે કેવી રીતે 'નવરા', 'નકામા', 'નિંભર' જેવાં વિશેષણો સાથે ગોદડું ખેંચીને જગાડવામાં આવે! આપણને એમ થાય કે આ સવાર જ કેમ પડી.   અમારો ચૂનિયો તો વરસાદ આવે એટલે કાળા કલરની થેલી લઈને ઘેર કહી દે કે 'હમણાં તમારા બધાં માટે ભજિયાં લઈને આવું.' હકીકતમાં પોતાના માટે નંગ ગોતવા નીકળ્યો હોય. ઘેર જઈને કહેવાનું જ હોય કે 'બધે એટલી ગરદી કે વારો જ ના અવ્યો. તારા હાથ જેવા ભજિયાં કોઈ ન બનાવે તું ઘેર જ બનાવી નાખ.' પણ હમણાં પરમિટના ભાવ વધ્યા પછી ગુજરાતમાં માલમાં વાટકી વહેવાર બંધ થઇ ગયો છે પણ ચૂનિયાને ક્યારેય આવા નાના મોટા પ્રશ્ર્નો ડગાવી નથી શક્યા. બે ચાર પરમિટ હોલ્ડર પાસે જઈ અને તબિયતથી નાખણી કરે 'મેં તો મૂકી દીધું છે પણ મોટા દીકરાને એવી શરદી થઈ છે કે દવાથી ફેર નથી પડતો. ૧૦ ૧૫ એમ એલ બ્રાન્ડી પીવડાવવી છે અને બાકી આખા શરીરે ચોંપડવી છે એટલે જો બ્રાન્ડી પડી હોય તો એકાદ કવાટરિયું આપશો?' હિન્દુસ્તાનમાં હજુ તબિયતના નામે દ્રવિ ઉઠતાં હૃદયો ધડકે છે. ચૂનિયો ૪ માંથી ૨ ને તો પાડી જ દે. વરસાદ આવે એટલે ચૂનિયો વરસાદી માહોલ જોતો જોતો ઘરના ભજિયાંના બાઇટિંગ સાથે બ્રાન્ડી પીતો મેં પોતે જોયો છે ત્યારે મને ફરી વરસાદ પર માન થઈ આવે કે આનો સદઉપયોગ પણ થઈ શકે. આ તો બહુ મોટા થયા પછી અમને પહેલા વરસાદના ઉપયોગની ખબર પડી બાકી નાના હતા ત્યારે અમને પહેલા વરસાદમાં અળાઇ મટાડવા માટે નવડાવવામાં આવતા!   વરસાદની જે મઝા હોય એ પણ જો એકવાર બાળપણમાં ખોવાઇને જોજો કે ભીની થઈ ગયેલી માટીમાં સૂયા ખૂંચામણીનો કેવો આનંદ હતો, માંડવીને ગોળ ખાઇને જે આનંદ મળતો એ કદાચ હવે ભજિયાંમાં નથી મળતો.   વરસાદમાં દારૂ પી ને મઝા કરવી એના કરતા હાથ પહોળા કરીને વરસાદી બૂંદોને સીધી મોઢામાં ઝીલવાનો નશો કંઈક ઓર જ હતો. ખાબોચિયાંમાં ઠેકડો મારીને મિત્રોને ભીંજવવાથી જે હાસ્ય મળતું અને પછી તમને પાણી ઉડાડવા પાછળ ફરતા, દોડાદોડી કરતા મિત્રોને જોઈને જાણે જિંદગી વસૂલ થઈ જતી. 'આવરે વરસાદ..ઢેબરિયો પરસાદ' આજે પણ ગાઈ જોજો અને પછી જે ખુશી મળે અનુભૂતિ કરજો. આ આનંદ સેલ્ફીમાં નહીં જ મળે, આ આનંદ ફેસબૂક પર સ્ટેટસ અપડેટ કરીને નહીં જ મળે કે નહીં મળે વોટ્સએપ પર બે ચાર ફોટા મૂકીને.   હાં એ વાત અલગ છે કે ગલીના ખૂણે ઊભીને અચાનક આવેલા વરસાદ પછી પલળીને નીકળતી છોકરીઓને તાકવાની મઝા આગલી બધી મઝાઓ પર ભારી પડી જાય છે પણ તોયે જૂનું તે સોનું.

--
You received this message because you are subscribed to the Google Groups "Keep_Mailing" group.
To unsubscribe from this group and stop receiving emails from it, send an email to keep_mailing+unsubscribe@googlegroups.com.
To post to this group, send email to keep_mailing@googlegroups.com.
Visit this group at https://groups.google.com/group/keep_mailing.
To view this discussion on the web visit https://groups.google.com/d/msgid/keep_mailing/CAH3M5Ou_Xs8hkowjmHOgujQstT4swPwUeb_SagOWD7s1kOKOJw%40mail.gmail.com.
For more options, visit https://groups.google.com/d/optout.