[ ::: ♥Keep_Mailing♥ ::: ]™ તુમ્હારા ખૂન ખૂન ઔર હમારા ખૂન પાની? (Gujarati)

Please use http://translate.google.com/ to translate this article to Language of your choice. તુમ્હારા ખૂન ખૂન ઔર હમારા ખૂન પાની? Dr. Sharad Thaker     કેલેન્ડરમાં જ્યારે જુલાઈ જાય છે અને ઓગસ્ટ આવે છે, હૈયામાં દેશભક્તિનાં મોજાં ઊછળવા માંડે છે, રગોમાં દોડતું ખૂન ગરમ થવા લાગે છે, મસ્તિષ્કની નસો 'ફાટું-ફાટું' થઈ જાય છે, દેશની આઝાદી માટે ખતમ થઈ ગયેલા હજારો દૂધમલ યુવાનોની વીરહાંક કાનોમાં પડઘાવા માંડે છે અને આંખોની 'દૂધ સી સફેદી' પર ત્યાગની, વીરતાની અને બલિદાનની રક્તિમ આભા અંજાઈ જાય છે. એ ક્રાંતિકારીઓના લાલચટ્ટાક લોહીથી છંટાયેલો ભૂતકાળ! અને આજનો ભ્રષ્ટાચાર, કાવાદાવા અને ગદ્દારીથી ખરડાયેલો વર્તમાન! સરખામણી ન કરવી હોય તો પણ થઈ જાય છે. અને સરખામણી કરવા માટે દર વરસે, દર વખતે નવું કારણ પણ મળી રહે છે.     અંદામાન ટાપુ પર આવેલી સેલ્યુલર જેલની એક એક કોટડીમાં  ભારતીય વીરતા અને બ્રિટિશ ક્રૂરતાનો દસ્તાવેજ સમાયેલો છે તાજેતરમાં બ્રિટનની કોર્ટના અંગ્રેજ જજ દ્વારા ભારત સરકાર પાસે માહિતી મગાવવામાં આવી: 'અમારા દેશમાં રહેવા આવેલો તમારા દેશનો અપરાધી અમે તમને સોંપીએ તો ખરા, પણ એ પહેલાં તમે તમારી જેલમાં કેવી અને કેટલી સુવિધાઓ છે તેની માહિતી આપો. એ ઓરડાની સાઇઝ, એમાં આવતાં હવા-ઉજાસ, ફર્નિચર, કોમ્પ્યુટર, ટી.વી, અખબાર, એટેચ્ડ ટોઇલેટ-બાથરૂમ, ભોજન, વસ્ત્રો તથા અન્ય સુવિધાઓ વિષે જો અમને સંતોષ થશે તો જ અમે તમારા ગુનેગારને તમારા દેશમાં પાછો મોકલીશું. અમને લાગે છે કે ભારતની જેલો માનવ અધિકારોના માપદંડ પર ખરી ઊતરી શકે તેવી નથી.' અને આ ગુનેગાર કોણ છે? શ્રીમાન રાજરાજેશ્રી મદ્યમહિપતિ, નગ્ન નારી ચિત્રોનો સંયોજક- પ્રાયોજક, ભારતમાતાની પવિત્ર ચૂંદડીને શરાબના પાત્રમાં ઝબોળીને અપવિત્ર કરી મૂકનાર, સુંદર-સમ્રાટ અને ગરીબ જનતાએ આપેલા ટેક્સના ચૌદ હજાર કરોડ રૂપિયાનું ફુલેકું ફેરવીને ફરાર થઈ જનાર ધ.ધૂ. પ.પૂ. 1008 વીરશ્રી વિજયકુમાર માલામાલ! આ જજ સાહેબને શું કહેવું? ગોરી ચામડીના આવરણ હેઠળ કાળું દિમાગ ધરાવનાર આ અંગ્રેજને માત્ર આટલું જ કહેવું છે કે તમે જે કેદી માટે ચિંતિત છો અને એને અમે જે જેલમાં રાખવાના છીએ તે આર્થર રોડ જેલ તમારા જ પૂર્વજોએ બંધાવેલી છે. આર્થર રોડની જેલ તો ઘણી સારી છે, પણ ઈ.સ. 1896થી ઈ.સ. 1906ના સમયગાળામાં તમે બંધાવેલી અંદામાનની સેલ્યુલર જેલ એ તો મૃત્યુ પછી મળતા નર્કલોકને પણ સારી કહેવડાવે તેવી હતી. આજે તમે ભારતના સૌથી મોટા જેબકતરા માટે માનવતાપૂર્ણ અભિગમનો હઠાગ્રહ સેવી રહ્યા છો ત્યારે એ યાદ કરો કે તમે જેમને પશુથી પણ વધુ તડપાવ્યા, રિબાવ્યા અને મરવા માટે મજબૂર કર્યા એ બધાં કોણ હતાં? એ અમારા ક્રાંતિવીરો હતા. કોઈ માણિકતોલા બોમ્બ વિસ્ફોટના બંકાઓ હતા, તો કોઈ લાહોર ષડ્્યંત્રના શૂરાઓ હતા. એમાં માલાબારના મોપલાઓ પણ હતા અને નાસિકના અંગ્રેજ કલેક્ટરની છાતીમાં ગોળી ધરબી દેનારા મરાઠાઓ પણ હતા. કોલકાત્તાના રાજમાર્ગ પર પૂરપાટ વેગે દોડી જતી બગીમાં પગપાળા દોડીને ચડી જઈને અંગ્રેજ અફસરનું લમણું વીંધી નાખનાર ટીનેજર 'ભાલો બાશી' બાંગ્લા કિશોર પણ હતો અને ચિત્તાગોંગના કાવતરામાં સામેલ થનાર સપૂત પણ હતો. સેલ્યુલર જેલની છસો અઠ્ઠાણું એકાંત કોટડીમાં પુરાયેલો એક-એક કેદી આજે અમારે મન એક એક 'ભારતરત્ન' છે. એ દરેક કેદીને તમે સુવિધાઓ રૂપે શું આપ્યું હતું? તેર બાય સાત ફીટની લંબચોરસ કોટડી, અસહ્ય ગરમી અને દરિયાઈ ભેજથી કોહવાતું બંધિયારપણું, ત્રણ બાય એક ફૂટની એક જ બારી અને સૂવા માટે પાથરણાં વિનાની એક સાંકડી પાટ! જમવામાં કાચો ભાત, પાણી જેવી દાળ અને બળી ગયેલી રોટલી. એક લોઢાનો વાડકો જે કાટ લાગવાને કારણે કાયમ માટે કોલસા જેવો કાળો થઈ જતો હતો. સેલ્યુલર જેલની એક એક કોટડીમાં  ભારતીય વીરતા અને બ્રિટિશ ક્રૂરતાનો દસ્તાવેજ સમાયેલો છે. ઉલ્લાસકર દત્ત. માણિકતોલા બોંબ કેસમાં સજા પામીને આવેલો યુવાન ક્રાંતિકારી. એને સજા ફરમાવનાર ન્યાયાધીશે પોતે કહેલું: 'ઉલ્લાસકર દત્ત ઇઝ વન ઓફ ધી નોબલેસ્ટ ઓફ બોય્ઝ આઈ હેવ એવર સીન...' અને એ ઉમદા યુવાનની આ બ્રિટિશ કારાગારે જે દુર્દશા કરી નાખી એ આઝાદીના ઇતિહાસનું એક આંસુભીનું પૃષ્ઠ છે. ઉલ્લાસકરને તેલના ઘાણામાં જોડવામાં આવ્યો. હુકમ થયો, 'રોજનું એંશી પાઉન્ડ તેલ કાઢવું પડશે.' એક સશક્ત બળદ પણ આખા દિવસમાં સોળ પાઉન્ડ તેલ કાઢી શકે. સુખી ઘરનો સુંવાળો છોકરો બિચારો તનથી તૂટી ગયો. બીજો આદેશ થયો: 'આ ભીની ઈંટો માથા પર ઊંચકીને બાર-બાર કલાક સુધી એક જગ્યાએથી બીજી જગ્યાએ લઈ જા.' ત્રીજો આદેશ: 'આ પાણી ભરેલી કાવડ, એક નહીં પણ બબ્બે કાવડ, ઢોળાવવાળા રોડ પર આવેલા અફસરના બંગલે લઈ જા.' આટલું કર્યા પછી ભોજનમાં દૂધ મળે તે વોર્ડન ગટગટાવી જાય. ત્રણ-ત્રણ મહિના સુધી એકાંત ખોલીમાં દંડા-બેડીની સજા પામીને એ સાવ તૂટી ગયો ત્યારે એને ખુલ્લી પીઠ પર નેતરની સોટીના ફટકા મારવાની સજા આપવામાં આવી. ફટકા કેવા હતા? એક એક ફટકે નેતરની સોટી એની કોમળ ચામડીમાં એક એક ઇંચ ઊંડી ઊતરી જાય. આ સોળ પાક્યા. ચેપ લાગ્યો. તાવ ચડ્યો. 107 ફેરનહીટ તાવમાં એને સનેપાત લાગુ પડ્યો. ઉલ્લાસકર બકવાસ પર ચડી ગયો. અભાનાવસ્થામાં પણ મોટી મોટી ચીસો પાડવા લાગ્યો. જેલર અને ડૉક્ટરે એને મારી નાખવાનો ત્રાગડો રચ્યો. એના દેહ પર તાર બાંધીને વીજળીના આંચકા આપવામાં આવ્યા. પરિણામે ઉલ્લાસકર મર્યો નહીં, પણ પાગલ તો થઈ જ ગયો. આજે પણ સેલ્યુલર જેલની દીવાલો ભારતમાતાના આ સપૂતની કારમી ચીસોથી ગાજે છે. આજે એ જ અંગ્રેજો એક લૂંટારા માટે માનવતાસભર સુવિધાઓ માટે આગ્રહ સેવે છે. બીજો સપૂત. ઇંદુ ભૂષણ રોય. બોમ્બ કેસમાં દસ વર્ષથી કાળાપાણીની સજા પામીને આવ્યો હતો. તેલનો ઘાણો, દંડાબેડી, હાથકડી અને ઉપરથી જેલના વોર્ડરોની ગંદી ગાળો. સંસ્કારી પરિવારનો છોકરો આટલાં બધાં અપમાનો સહી ન શક્યો. એક દિવસ સાંજના સમયે પરસેવે તરબોળ, હાથમાં ત્રીસ રતલ તેલ ભરેલી બાલદી, ઝૂઝેલી ગરદન, પગમાં વજનદાર સાંકળ, અપમાનના પહાડ નીચે તૂટી ગયેલો ઇંદુ ભૂષણ બીજા કેદીઓની ખોલીઓ સામેથી પસાર થતી વખતે બબડતો ગયો: 'ના, હવે નથી જીવવું. આ માનહાનિભર્યા જીવન કરતાં તો મરવું સારું!' અને એ રાત્રે જ ઇંદુ ભૂષણ લટકી ગયો. પોતાનાં કપડાંમાંથી એક કટકો ફાડીને એની દોરી બનાવીને એણે ફાંસો ખાઈ લીધો. ગરદન ભાંગી ગઈ. એક સ્વમાની જિંદગી ભારતને આઝાદ કરાવવાની ઝંખનામાં અપમાનજનક મૃત્યુને ગળે લગાડીને આથમી ગઈ. ભાનસિંગ નામનો પંજાબી યુવાન. બ્રિટિશ જેલની અમાનુષી યાતનાઓના વિરોધમાં એણે અવાજ ઉઠાવ્યો. ભૂખ હડતાલ શરૂ કરી. જેલર ડેવિડ બારી દાનવ કરતાંયે વધારે ક્રૂર હતો. એ પણ જીદે ભરાયો. સતત છ મહિના લગી અનશન વેઠીને ભાનસિંગ આખરે દેહથી આથમી ગયો પણ શહીદી પામી અમર બની ગયો. રામરક્ષા નામનો પંજાબી બ્રાહ્મણ પણ આવું જ શૌર્ય દાખવી ગયો. એણે જેલમાં પગ મૂક્યો એ સાથે જ હુકમ કરવામાં આવ્યો, 'તારા ડાબા ખભા પર આ દોરીઓ પહેરી છે એ ઉતારી નાખ.' જેલના કાયદા પ્રમાણે કેદીએ આત્મહત્યા કરવામાં ઉપયોગી થાય તેવી તમામ ચીજો કાઢી નાખવી પડતી હતી. રામરક્ષાએ આંખોમાંથી આગ વરસાવી, 'આ સામાન્ય દોરીઓ નથી, જનોઈ છે. મારા દ્વિજત્વની પવિત્ર નિશાની છે. હું એને પ્રાણાંતે પણ શરીરથી દૂર નહીં કરું.' જમાદારે ખેંચીને જનોઈ તોડી નાખી. બસ, થઈ રહ્યું! એક તો પંજાબી અને ઉપરથી પરશુરામનો વંશજ! એ દૂધમલા યુવાન તાડના ઝાડની જેમ ટટ્ટાર થઈ ગયો! ખાવા-પીવાનું છોડી દીધું. પાણી પીવાનું પણ બંધ. પંદર દિવસ પસાર થઈ ગયા. ડૉક્ટરો ગભરાયા. એ માથા ફરેલા યુવાનના નાકમાં રબ્બરની નળી દાખલ કરીને દૂધ પિવડાવવાનો પ્રયત્ન કર્યો? રામરક્ષાએ આંચકો મારીને નળી ફેંકી દીધી. ત્રીસ કરતાં પણ વધારે ઉપવાસો કર્યા પછી એ પવિત્ર માણસે પ્રાણત્યાગ કર્યો. આ હતભાગી કેદીઓમાં એક હતા સ્વાતંત્ર્યવીર વિનાયક દામોદર સાવરકર. ક્રાંતિનો યુવરાજ. ભારતમાતાનો દુલારો સપૂત. બેરિસ્ટર બનવાની યોગ્યતા પામેલો અને છતાં અંગ્રેજોના અન્યાયબોધનો ભોગ બનેલો તેજસ્વી વકીલ. આજે જે બ્રિટિશ જજ એક શરાબના 'બુટલેગર' માટે જેલમાં ફાઇવસ્ટાર સવલતોની અપેક્ષા રાખી રહી છે એ જ બ્રિટિશરોએ વીર સાવરકરની સાથે શું કર્યું હતું? એમણે જ લખેલી 'મારી જનમટીપ' વાંચી જજો. રડી પડશો.   કોલકાત્તાથી છસો કિ.મી. દૂર સમુદ્રમાં આવેલા અંદામાનમાં રાક્ષસી કરોળિયા, ઝેરી રસેલ વાઇપર સાપ અને લોહી ચૂસતી જળોથી ઊભરાતાં જંગલી ટાપુની વચ્ચે નર્કાગાર સમાન જેલ બનાવનાર અંગ્રેજો હવે ભારતની જેલનો હિસાબ-કિતાબ પૂછી રહ્યા છે, એવું લાગે છે જાણે તમાકુના ખેતરનો માલિક તુલસીના છોડ પાસે એની પવિત્રતાનો પુરાવો માંગી રહ્યો હોય! એક જ ઘટના વર્ણવું છું. સાવરકરજીને સખત તાવ ચડ્યો. એમણે જેલર પાસે તાવની દવા માગી. જેલરના કહેવાથી ડૉક્ટરે પીવાની દવા આપી, પણ એ દવા શેની હતી? રેચની દવા હતી. જે દવા આપવાથી કબજિયાતના દર્દીને પણ ત્રણ-ચાર વાર ઝાડે જવું પડે તેવી જલદ રેચક દવા એટલા માટે સાવરકરજીને આપવામાં આવી કે એ શરીરથી નબળા પડી જાય. એ આખી રાત સાવરકરજી પાતળા પાણી જેવા ઝાડા કરતા રહ્યા. સફાઈ માટે ન તો પાણી હતું, ન કપડું. એમની કાળ કોટડીની અંદર જ આખી ભોંય દુર્ગંધ મારતા પ્રવાહી મળથી ભરાઈ ગઈ. સવારે સાવરકરજીએ વોર્ડનને વિનંતી કરી, 'મહેરબાની કરીને મારી ઓરડી પાણીથી ધોવડાવીને સાફ...' જવાબ મળ્યો, 'આવી સફાઈ કોઈ કામદાર નહીં કરે. તારે જાતે જ કરવી પડશે. તને સાવરણો નહીં આપવામાં આવે, કપડું પણ નહીં અને પાણી પણ નહીં. આ બાલદી લે અને તારા બંને હાથથી મળ ઉલેચીને આ બાલદીમાં ભરતો જા.' અહીં વાક્યોમાં જ્યાં વિરામચિહ્્નો છે ત્યાં ગંદી ગાળો આપવામાં આવી હતી. મા અને બહેન સમાણી ગાળો. એક ગમાર વોર્ડર એક બેરિસ્ટર દેશભક્તને આવી 'માનવતાપૂર્ણ' ટ્રીટમેન્ટ આપી રહ્યો હતો! કોલકાત્તાથી છસો કિ.મી. દૂર સમુદ્રમાં આવેલા અંદામાનમાં રાક્ષસી કરોળિયા, ઝેરી રસેલ વાઇપર સાપ અને લોહી ચૂસતી જળોથી ઊભરાતાં જંગલી ટાપુની વચ્ચે નર્કાગાર સમાન જેલ બનાવનાર અંગ્રેજો હવે ભારતની જેલનો હિસાબ-કિતાબ પૂછી રહ્યા છે, એવું લાગે છે જાણે તમાકુના ખેતરનો માલિક તુલસીના છોડ પાસે એની પવિત્રતાનો પુરાવો માંગી રહ્યો હોય!

--
You received this message because you are subscribed to the Google Groups "Keep_Mailing" group.
To unsubscribe from this group and stop receiving emails from it, send an email to keep_mailing+unsubscribe@googlegroups.com.
To post to this group, send email to keep_mailing@googlegroups.com.
Visit this group at https://groups.google.com/group/keep_mailing.
To view this discussion on the web visit https://groups.google.com/d/msgid/keep_mailing/CAH3M5Os9eOhAwBBvc3bkk0sF3Vtkaq3LEi8yxCH-DmWiHXuk3A%40mail.gmail.com.
For more options, visit https://groups.google.com/d/optout.